Dili, loron 2 fulan-dezembru tinan 2020 –  Orsamentu Jeral Estadu (OJE) ba tinan 2021 nian, kuarta loraik ne’e hetan ona aprovasaun iha jeneralidade iha Parlamentu Nasionál ho votu a favor 44, kontra 0, no abstensaun 0, ho auzénsia hosi deputadu 21 Bankada CNRT nian, hafoin debate durante loron tolu nia laran hahú iha loron segunda lokraik semana ne’e.

Iha intervensaun antes ba votasaun, S.E. Primeiru-Ministru Taur Matan Ruak apresia debate jeneralidade durante loron tolu nia laran, hodi subliña OJE 2021 importante atu ajuda nasaun sai hosi resesaun ekonomia no dudu kresimentu ekonómiku.

“Governu apresia iha debate jeneralidade Orsamentu Jeral Estadu 2021 nian no agradese ho laran tomak kontribuisaun nain deputadu/a hodi hariku ita nia diskusaun durante debate loron tolu nia laran. Orsamentu 2021 importante tebes hodi ajuda ita-nia nasaun sai hosi resesaun no dudu kresimentu ekonómiku hodi fó serbisu no rendimentu ba iha famílias no ita-nia traballadór sira”, apresia Xefe Ezekutivu.

Nune’e aproveita biban refere, lori VIII Governu Konstitusionál nia naran, Xefe Governu agradese ba Bankada hotu-hotu iha durante debate jeneralidade.

“Governu kontinua kompremitidu atu halo esforsu hodi hariku diskusaun sira ne’ebé sei tuir mai iha espesialidade hodi hetan aprovasaun hosi uma fukun ida ne’e, tanba ne’e lori VIII Governu Konstitusionál nia naran hakarak dala ida tan agradese ba apoiu tomak ne’ebé hetan hosi distintu/a sira hotu hosi Bankada hotu-hotu ba esforsu Governu nian iha aprezentasaun OJE 2021”, tenik Primeiru-Ministru.

OJE 2021 nian ho montante dolar amerikanu millaun rihun 1,895, hosi númeru ne’e dolar amerikanu millaun 541 ba kapitál sosiál, dolar amerikanu millaun 475 ba dezenvolvimentu infraestrutura, dolar amerikanu millaun 338 ba dezenvolvimentu ekonómiku, no dolar amerikanu millaun 470 ba konsolida kuadru institusionál.

Diskusaun ba espesialidade sei kontinua iha sesta, loron 4 fulan-dezembru tinan 2020. HOTU/M-GPM.