Dili, 30 Novembru 2018:  S.Exa. Primeiru-Ministru Taur Matan Ruak, simu iha audiénsia Grupu Movimentu Universitáriu Timor-Leste (MUTL), sesta-feira ne’e iha Palasiu Governu Dili.

Hafoin rona-tiha ezijénsia grupu MUTL nian kona-ba asuntu sosa karreta Prado ba Membru Parlamentu Nasionál ne’ebé durante sira ezije atu kansela, Xefe Governu akonsella hodi dehan, invés halo asaun manifestasaun ne’ebé parte terseiru bele tama estraga, di’ak liu MUTL halo de’it debate akadémiku ou buka dadus kona-ba kustu uza karreta estadu nian iha Ministériu sira pois rekomenda ba Governu hodi oinsá hadi’a mekanizmu para evita gastu, tanba problema boot ne’ebé daudaun ne’e iha, mak iha Governu kona-ba uza karreta estadu ne’ebé gasta kustu boot, i la’ós iha Parlamentu Nasionál, asuntu sosa karreta ba deputadu PN ne’e buat ki’ik.

Xefe Governu hatutan,  Deputadu sira presiza duni iha  transporte  ida viavel atu fasilita halo fiskalizasaun ba serbisu Governu nian  to’o suku sira ne’ebé kondisaun estrada at.

Aleinde ne’e, eis Gerrilleiru FALINTIL mós sujere ba grupu MUTL sira atu konsentra ba estudu hodi iha futuru mai bele kaer estafeta ukun, tanba luta ne’ebé eroi sira halo ne’e, husik hela ba joven sira atu kontinua lori nasaun ne’e ba oin.

Xefe Governu esplika ba MUTL sira katak, desizaun Parlamentu Nasionál nian sosa karreta ba membru Parlamentu Nasionál, Governu labele intervein, maibé Xefe Governu fiar katak ezijénsia MUTL nian sei iha solusaun ho maneira diálogu. Xefe Governu mós apresia ho komportamentu no sivísmu grupu MUTL nian, hodi husu MUTL hanesan intelektuál universitáriu, hato’o ezijénsia ho maneira ne’ebé sivísmu, i VIII Governu Konstitusionál nakloke simu opiniaun no ideia sira hosi sosiedade sivíl, akademsita sira atu kontribui ba hadi’a governasaun.  HOTU