Só Iha Estadu Emerjénsia Mak Estadu Bele Limita Sidadaun Nia Direitu

• CSDS no CE Unanimidade aseita Estensaun Estadu Emerjénsia

Dili, 22 Abril 2020: S.Exa. Primeiru-Ministru Taur Matan Ruak afirma, Estadu só bele limita sidadaun sira-nia direitu ba sirkulasaun no organizasaun wainhira iha situasaun Estadu Emerjensia ka Estadu Sítiu, se sés hosi ida ne’e, Estadu la bele interrompe direitu sidadaun sira nian, tanba Konstituisaun la fó dalan.

“Kuandu ita limita sidadaun nia direitu, ne’e só através Estadu Emerjénsia ka Estadu de Sítiu, se sem ida ne’e, Konstituisaun la fó dalan. Porezemplu ita atu taka aeroportu, ita haruka ema labele reuni, ne’e só iha Estadu Emerjénsia. Ita-nia kazu hanesan Portugal”, dehan Xefe Governu.

Entretantu Estadu Emerjénsia ne’ebé Prezidente Repúblika dekreta iha loron 27 fulan Marsu 2020 ne’e, sei termina  iha loron 26 fulan Abril 2020, maibé haree ba kazu propagasaun Surtu COVID-19 ne’ebé kontinua sa’e, mak Konsellu Ministru iha reuniaun extraordinária Segunda-feira ne’e, aprova estensaun Estadu Emerjénsia hodi husu ba Xefe Estadu atu prolonga tan ba fulan ida.

Hafoin simu tiha pedidu Governu nian, Xefe Estadu iha  Kuarta-feira ohin, konvoka Reuniaun Konsellu Superior Defeza Seguransa (CSDS) no Konsellu Estadu (CE) iha Palásiu Prezidente, hodi diskute proposta governu nian ne’e, no iha reuniaun refere, membru sira ho unanimidade aseita atu Prezidente Repúblika estende tan ba fulan ida.

“Konsellu rua apoiu unanimidade rekomenda ba Prezidente Repúblika, atu haruka karta ida ba Parlamentu Nasionál hodi halo estensaun Estadu Emerjensia”, dehan Francisco Vasconcelos, Xefe Kaza Sivíl Prezidénsia Repúblika nian ba jornalista sira hafoin reuniaun CSDS no CE.

Kona-ba medida sira iha estensaun Estadu Emerjénsia nian, sei regula hosi Dekretu Governu nian. HOTU