Dili, 7 Febereiru 2019 : S.Exa. Primeiru-Ministru, Taur Matan Ruak,  ho akompañadu hosi Ministru  Transporte no Komunikasaun, Agostinho da Silva  no Prezidente ANATL , simu audiénsia Embaixador Japaun iha Timor-Leste, Hiroshi Minami  no  ekipa tékniku hosi JICA,  hodi aprezenta ba Xefe Governu kona-ba  dezeñu preliminaria Aeroportu Internasionál Prezidente Nicolau Lobato  nian, ne’ebe Japaun mak sei finansia.

Tékniku ho JICA daudaun ne’e iha ona Timor-Leste hodi halo diskusaun ho parre tékniku Ministériu Transporte no Komunikasaun no ANATL kona-ba dezeñu aeroportu  ne’e nian, hodi husu sujestaun Governu Timor-Leste nian molok atu halo elaborasaun final,  no tuir planu Governu rai rua sei asina  nota entendimentu iha fulan Maiu tinan ne’e no hahú  konstrusaun  obra iha fulan Setembru, enkuantu durasaun ba konstrusaun han tinan rua, ne’ebé sei hotu iha 2022.

Tuir Ministru Transporte no Komunikasaun katak, komponente sira ne’ebé Governu Japaun konkorda sei finansia atu halo mak hanesan, terminal ba pasajeiru sira nian, tore kontrolu, taxway, apron no estrada asesu ba Aeroportu nian, ho total valor $45 millaun, no aeroportu  ne’e rasik sei konstrui tuir padraun internasionál. HOTU