Dili, loron 9 fulan-abríl tinan 2021- Reuniaun Konsellu Ministru estraordinária iha loron kinta semana ne’e, aprova ona Rezolusaun Governu nian ba Deklarasaun Estadu Kalamidade ba loron 30, no aprova mós mobilizasaun apoiu internasionál nian atu hodi hatán ba impaktu sira inundasaun nian iha loron 4 fulan abríl ne’ebé provoka hosi siklone tropikál Seroja.

Tuir dadus provizóriu hosi Sekretáriu Estadu Protesaun Sivíl ne’ebé   aprezenta iha sorumutu Konsellu Ministru nia, impaktu hosi mota boot bee sa’e ne’e no rai monu, destrói infraestrutura públiku lubuk boot, no besik ema rihun sanulu maka lakon uma iha Dili, seidauk inklui munisípiu seluk ne’ebé mós hetan afetadu. Aleinde ne’e siklone tropikál Seroja refere, hamate ema 42, na’in 22 husi Dili, sanulu iha Ainaro, lima iha Manatutu, na’in tolu iha Vikeke no na’in rua iha Aileu, enkuantu predisaun provizóriu ba kustu hosi estragus infraestrutura sira, liu dolar amerikanu millaun 100. HOTU/M-GPM